يوم خطوبتى....2

حلقة 2

" اقسمت عليكي يا نفسي ببارئك .. اني تكون في عفة مريم حين تصادفي قائدك الي الجنة وزوجك وشطر روحك "

هدير حست بصدمة .. وكأن اللي كتب الورقة دي واحدة تانية .. غير اللي عامله فرحها في قاعة كلها رقص ودي جي بعد كام ساعة .. عنيها دمعت ومستحملتش الموقف .

- لولولوولولولوللللي .. مبروك يا دودو .. يا حبيبة قلب طنط سعاد .. مال عيون العروسة معيطة كدة ليه؟؟

- ربنا يكرمك يا طنط .. دي بس دموع الفرح ... وخايفة الاقي نفسي في يوم في بيت وماما في بيت تاني .

- دي سنة الحياة يا بنتي .. ماحنا كمان مكناش نقدر نبعد عن اهالينا .. وادينا قدرنا وهم قدروا .. قومي يلا اغسلي وشك .. فستانك وصل .. كلها ساعة وتنزلي علشان نروح للكوافير ... اسيبك بقي... متتأخريش
---------------
هدير وشها اتقلب لما سمعت كلمة الفستان والكوافير

طب اعمل ايه في الورطة دي .. انا دلوقتي لازم انزل والبس الفستان اللي اسمه بس يغطي جسمي وهو كاشف دراعاتي كلها وضيق جدا .. وملفت بشكل مش طبيعي .. كأني بقول للناس انا اهو

اعمل ايه وانا كمان ساعة هيبقي وشي بين ايدين راجل غريب عني قاعد يلغبط فيه بالالوان علشان يطلعني شبه عروسة المولد وكل واحد حابب يتفرج علية .. يبص شوية ببلاش

اعمل ايه وانا كمان كام ساعة هبقي قاعدة وسط بنات بترقص وكأنها (سلطة بنات) علي المسرح .. اللي لابسة بنطلون اخضر واللي لابسة فستان ضيق احمر و اللي ضبغالي خصلتين في شعرها ازرق .. وكل واحدة جاية تظبطلها عريس

بقي هي دي مريم يا هدير ؟؟؟ بقي هي دي مريم ؟؟ والله كدة حرام علية نفسي .

حتي لو غصب عني .. كل الوقت ده يا تري هيتكتبلي في الشمال ولا في اليمين؟؟

صبرني ياااارب .. انا قلبي مش مطاوعني اعصيك .. اعمل ايه بس .. ياريتك يا سامر كنت شخص يقدر يعيني علي الطاعة .. مكنتش وصلت للحال ده ابدا

اجهشت هدير في البكاء الشديد . وما كان لها الا ان تنفذ ما طلبته منها خالتها سعاد و تكاد تموت الف مرة في الدقيقة الواحدة .. عندما كانت تحمل فستانها وتفتح باب منزلها لتنزل علي السلم وسط الزغاريت وتهنئة الجيران .

----------------------

في السيارة ..

- انتي ليه مش لابسة دهبك يا هدير .. كدة تنسيه ومتلبسهوش .. انتي عايزة اهل العريس ياكلوا وشنا؟؟

- وهياكلوا وشنا في ايه بس يا ماما .. وهم مالهم اصلا البس دهبي ولا ملبسهوش ؟

- انتي عيزاهم يقولوا علي ابنهم ان هو اللي مصيغك .. وانك ما صدقتي وافقتي بعريس علشان تلبسي دهب .. لازم الناس كلها تعرف انك بنت عز .. وهو اولهم .

- ايه يا ماما اللي بتقوليه ده .. دي دبلة اللي هلبسها .. حتي مكانش الموضوع مستاهل قاعة ولا كل المعازيم دول .. بقي دبلة اللي هيعايروني عليها !!

- بطلي عبط .. كويس اني افتكرت وجيبتلك 3 خواتم وغويشتين وسلسلة معايا .. والخاتم تلبسيه في نفس الصباع اللي هتلبسي فيه الدبلة .. علشان تقلعي دهب وتلبسي دهب .

- يا خبر!! ليه يا ماما بس كل ده .. احنا كدة هنجرح مشاعره .. انتي عارفة كويس انه لو كان يقدر كان جاب اكتر من كدة .

- يا حبيبتي دي عادات قديمة .. وعمر ما حد اشتكي منها .

- عادات غلط يا ماما .. ولازم تتغير .. لازم الناس تراعي مشاعر بعض شوية .. اكيد هو نفسه من جواه متأزم .

- خليكي بدماغك .. هو انا غلطانة يا سعاد ياختي؟؟

- لا يا نجاح عداكي العيب .. بس انا مش اللي هقولك ان هدير دماغها ناشفة .


وهنا وقفت السيارة امام محل الكوافير .. تمنت هدير للحظات لو ان اصابها شلل قبل ان تخطو خطوة واحدة داخل المحل

----------------
وداخل المحل ..

هدير : السلام عليكم يا استاذ متولي .. هو بعد اذنك مينفعش ابدل الكوافير الراجل بواحدة ست تعملي الميكب بتاعي ؟؟

صاحب المحل : وعليكو السلام ورحمة الله .. يعني بعد ما بعتنا للراجل اللبناني عشان يجي من بيته ومسنتظر انه ياخد عمولته .. وفضي نفسه علشانك من يجي اسبوع .. تيجي يومها قبلها بربع ساعة تقولي مش عايزة .. مينفعش الكلام ده يا مزمازيل.

هدير : معلش يا استاذ متولي .. انا هدفع الفرق من عندي بس بلاش كوافير راجل .. اي بنت فاضية عندك

صاحب المحل : مش علي الفلوس يا مزمازيل .. يا فتاح يا عليم يا رزاق يا كريم .. بس انا معنديش ولا بت فاضية دلوقتي ..وكمان معنديش قسم للمحجبات .. يعني هي هي .. ولو عايزة تلغي الحجز وتدفعي 25% بس .. معنديش مانع .. بس مش هتلاقي ايتوها كوافير يرضي يفضيلك نفسه دلوقتي

نجاح (ام العروسة ) : ايه قلة الذوق دي .. انتي جاية تعملي علينا شيخة دلوقتي .. ما تخليصنا بقي .. ماكان من الاول .. ايه شغل العيال ده

هدير بدأت تعيط . وبدت كالمغلوبة علي امرها .. فأخذتها خالتها سعاد في حضنها .. وطبطبت عليها

سعاد: معلش يا حبيبتي .. والله ده شيطان .. استهدي بالله كدة .. دي عين وصابتك يا حبيبتي .

هدير : يا خالتو انا حوالية الف شيطان عايزني اعصي ربنا .. وبيزنوا في عيني كل حاجة حرام .. جوايا ضعيف بيقول افرحي زي ما هم عايزينك تفرحي .. وجوايا حاجة .. بتقولي اثبتي .. وخليكي زي السيدة مريم .. عفيفة .. مفيش بشر قربلها .. انتوا حاسين بية ؟؟

صاحب المحل : استهدي بالله يا عروسة واطلعي البسي فستانك والكوافير زمانه جاي في السكة علشان يعملك ميكياجك ويلبسك الطرحة .
هدير : يا ناس حسوا بية .. انا فقت .. بس متأخر .. مش قادرة اسمح لواحد غريب يلمس وشي .

نجاح(والدة هدير) : اصطبحي وقولي يا صبح .. بدل ما والله العظيم ما هيحصل طيب .. اطلعي البسي فستانك وجهزي طرحتك.

هدير بقهر وسخرية : طرحة ايه بقي .. ربنا يسامحني يارب


وظلت هدير تبكي من حين لحين داخل المحل فآثارت غضب الكوافير لأنها تفسهد ما يصنعه ببكائها

الكوافير : انتي بتخليني عصب عليكي اختي .. اهدي شوي .. انا وراي شغلات غيرك .. وبعدك ما انتهيتي من الاساس .. شبيكي ماما؟؟!

نجاح( ام العروسة ) : شكلها عين وصابتها .. ربنا يهديها .

هدير : يااااارب

وبعد لحظات ...

لولولولوللللي .. العريس في السكة شهلي شوية يا عروسة (سعاد).

هدير في سرها : يارب انا اهون علية اموت من اني اطلع علي الناس بالهدوم اللي بتفضح اكتر ما بتستر دي .. الاختبار ده صعب علية اوي يااارب .

يتبع <<