حلقة 3

زفة ودوشة علي باب الكوافير ..

هدير خلاص لبست طرحتها الاسبانيش وفستانها ابو دراعات شفافة .. وتاج بسيط علي راسها

حطت ماكياجها الخرافي اللي اصحابها بيحسدوها عليه .. ومنهم اللي فرحان لها بيه

مسكت بوكيه الورد ولقت البنات جاية تقرصها في ركبتها

هدير : ايه اللي بتعملوه ده .. ركبتي .. بس .. ايه ده .. أي ..ايه ده!!

البنات عمالة تضحك .. وتقولها :: بنقرصك في ركبتك يا عروسة علشان نحصلك في جمعتك

هدير ( بضحكة سخرية ) : هو انتوا بتصدقوا التخاريف دي يا جامعيات يا متعلمات .. اومال هنسيب ايه للبصمجية ؟!

احداهن : نعم نعم يا ست هدير .. هو انتي عمرك ما قرصتي عروسة في ركبتها؟

هدير : لأ طبعا .. انا مستحيل اصدق الخرافات والبدع دي .. انتوا اكيد بتهزروا هههههههههه

احداهن : اومال اتخطبتي ازاي يا فالحة

اخري : ههههههههههههه لالا متصدقيهاش يا ديرو احنا بنهزر معاكي احنا عارفين ان دي تخاريف بس طقوس اتعودنا عليها في الافراح

هدير : يعني انتوا مش خايفين تكون حاجة حرام يا جماعة .. هو اي تخاريف نمشي وراها كدة وخلاص؟ من غير ما نشوف دي اصلها ايه؟

نجاح( ام العروسة ) : ست الشيخة .. مش وقت الهبل اللي بتقوليه ده ... يلا سامر مستنيكي تحت .. ولا اخليه يطلعلك؟

سعاد (بسخرية) : قال بطلوا ده واسمعوا ده .. هدير هتعمل علي اخر الزمن علينا ست الشيخة .

هدير : هو اللي يقول الحق تتريقوا عليه .. طب اديني سكت اهو ..

نجاح : لولولوللولوللللي .. تعالي يا عريس امسك ايد عروستك

سامر جه يشبك دراع خطيبته في دراعه .. قالتله لأ

سامر (بصوت واطي): بلاش فضايح يا ديرو .. هاتي ايدك ..

هدير : لأ طبعا .. سامر من فضلك .. متحرجنيش قدام الناس.

سامر : يا هدير انتي اللي بتخلي الناس يبصوا علينا .. هو في عريس وعروسة في زفة قدام الكوافير مش حاطين ايدهم في ايد بعض؟

هدير : معلش استحملني يا سامر .

هدير قاعدة تبص علي الناس .. وعلي اصحاب العريس اللي بيزفوها .. والناس اللي واقفة من البلكونات .. مش قادرة تتحمل عيون الناس وهي بتبص علي لبسها .. وعلي ماكياجها وزينتها .

اصحابها واهل العريس قاعدين يقولوا ماشاء الله لبسها محترم اوي ولابسة حجاب .

وهي قاعدة تلوم نفسها .. هو انا لو كنت فعلا محترمة ديني وحجابي .. وكان لبسي محتشم .. كان زماني دلوقتي في نص هدومي من كتر نظرات الشباب الاغراب لية ؟؟

هدير : ماما انا سقعانة اوي ممكن تجيبيلي الشال بتاعي البسه فوق الفستان .؟

نجاح : شال ايه اللي فوق الفستان .. اركبي عربيتك اركبي مع عريسك .. بلاش شغل فلاحين .. ده حتي الفلاحين ميعملوش كدة .

ركبت هدير وراحت علي القاعة

يتبع <<