باليسرى واليمنى اثاري

تاريخ التسجيل : 07/05/2014

باليسرى واليمنى اثاري ما سئلوك
ماكَالوا منين بجسمك اليطبع
حرورة بدوي بي من ارجع الا بشار
يجي يوم انتلاكَه واخذه مربع
جسمك مو الي بس انه المسوي
بكيفي بمشتهاتي بأي وقت ازرع
عفتك بس درت وجهي وحضني اكفاك
غزرت بي ملوحة حضني واتوجع
يربي اموادع الاحباب يهدم حيل
وانه بريشه اندفع والغيم مني اسرع
وتتمايل وي الريح من تمشي تذوب
بنفس قالب يوسف انصغتوا سوه
اطيح كل وصله بركن لمن تفوت
انجمعك اندزك وراك الهوه
الناس متاني شمس تنطر ضواك
فلاح حسنك للشمس يزرع ضوه
ما نسكر احنه بكاس نسكر من تفوت
نشوف جدمك راس تتمشى عكس
كمت اكتبلك نفس تطلعلي روح
يعني بس اكتب ضوه تطلع شمس
من كثر دمعي صبح برموشي ناي
شما اريد ابجي الك اعزف لحن
ياطبيب اسودنت جايب دواك
اني مو من جرحي من ولفي اون
شافني اضحك كال مرتاح شعليك
وهاي موضحكة فرح ضحكة حزن
تريدني اضحك,,ابتسم,؟وانت مشيت
والدمع راسم خيالك عالجفن
سجن بشفايفك ولا واحد سجين
مذنب انه ولخاطرك ذبني بسجنك
انتَ ابني وجنت بأحضاني تنام
الينسى ابوه سهله,صعب ينسى الحضن
من تسولف تخدر الشمس وتنام
ولو ان تضحك يبتسم وجه الصنم
العرس ينكَلب مأتم لو تجي
الميت ابوه من شافك اكَباله ابتسم
لو حرب بالحسن سوي شي اكيد
من حسنك العالم جذب واحد سلم
بلم حسن الناس بس انتَ بحور
كَبال حسن البحر لاشي البلم
قلم شفتي ورق شفتك يمته ها
بحجة اكتبلك شعر بوس القلم
سبحانه ربك يعرف يعذب الشباب
الشافك احلف كَلبه يوكف مايدك
الناس مخبوصه بجهنم ياعجيب
انتَ يم حسنك جهنم تحترك
المايشوفك مو نقص لا حقه هاذ
لان الناس الشافتك كصت جفوف
بكثر ما شفاف يمشي وجنه ماي
مونشوفه اليمشي كَدامه نشوف
انه اشك بالجابته ولدكَولي ليش
انتَ سامعلك بشر خلف ملاك
الكَلك انت احلى بشر جذب عليك
لان وجه الشمس صاغوه من ضواك
القالب السوك بي ما فلشوه
كفر بي ينخلق واحد من وراك
اذن لو جيت بشوارعنه شيصير
يمكن يضنون يوم الاخره
وكلها الاول بالسره رادت تصير
شنهي سهله الشافك يرد ليوره
وكلنه نركض وين متودينه
اروح حتى لو للنار هم نلزم سره
الملك خدام اله تلبسه الثياب
انت مو خدام الي تلبسك حمام
موحرام نحب شباب وروح ابوك
بس نحبك لايجوز وهم حرام
صوره شعريه على خدك لو تشوف
الدمعه فوك خدوده رسمت رايه
انكتب بيها الحسن منه واليه
ومن وراه خدودك رجعنا سبايه
بحضرت عيوني اجومه وبيها اطوف
بجلده اصلي وجن على امصلايه
بعيد ميلاده اجت كلها تزور
حتى من الصين اجو مشايه