كلنا منعرف قديش صعب علينا إنه نصحى الصبح بكير.. .. كلنا منكون بدنا بس كمان 5 دقايق نوم .. و حتى مع هدول إل 5 دقايق منضل نعسانين .. وأول حصة بالمدرسة الأستاذ بكون يحكي لحاله

ومحدا بيكون مركز معه !

هون راح نعطيك أكم نصيحة عشان تساعدكو تقوموا الصبح نشيطين وتبلشوا نهاركو بحيوية :

1. يمكن أهم نصيحة ممكن أعطيكو إياها إنه ما تروحوا تناموا متأخرين ! الواحد بفكر إنه ممكن يعوض ساعات النوم اللي ناقصتو في نهاية الأسبوع أو تاني يوم .. بس بحب أقولكو انو حتى لو نمتوا تاني

يوم كل النهار .. الجسم ما برتاح زي ما لازم.. عشان هيك.. لازم تعودوا حالكو إنه تناموا بكير .. و تعطوا الجسم عالقليلة 7 ساعات نوم يرتاح فيهن ..!


2. الضوء بساعدكو تصحو بكير..

الضوء بساعد الساعة البيولوجية عند الإنسان تكون مضبوطة و بقلل من إفراز الهرمون المسئول عن زيادة التعب والنعاس .. الضوء وأشعة الشمس بالذات بتساعد على تنشيط الدورة الدموية في الجسم

.. عشان هيك .. بنصحكوا إنه ما تسكروا كل الشبابيك والستارات لما تناموا.. خلو مجال لأشعة الشمس تفوت و تساعدكو تصحوا بكير ..!


3. ما تستغنوا عن وجبة الفطور .. !

يعني بعد كل المجهود اللي عملتو عشان تقوموا من التخت .. اعملوا كمان شوية مجهود إضافي و افطروا منيح .. عشان تعطوا جسمكو الطاقة اللازمة ليكمل نهاره.. وهيك بتكونوا عملتو اللي عليكو ..


4. اووكي .. بقدر أفهم إنه بعد في ناس صعب عليها تقوم وتصحصح معانا .. وعشان هيك ... أنا بقترح عليهن يعملوا شوية رياضة عالصبح . . وما تخافوا.. راح تعملوهن و انتو بعدكو نايمين

عالتخت ... ممكن تشبكو ايديكو وراء الرأس وتحركوا الرجلين .. أو ممكن تساووا أي حركات بتحبوها عشان تساعدوا في تنشيط الدورة الدموية.

5. شوية موسيقى على الصبح فكرة كتير حلوة ... و بترفع من المعنويات و بتساعدك تصحى.


6. و إذا بعد كل هاي النصائح ومع 5 ساعات منبهة على الصبح بعدكو بتواجهوا صعوبة في انكوا تصحو بكير.. من المفضل تزوروا دكتور.. لأنو ممكن يكون في سبب صحي مثل ضغط الدم

المنخفض اللي بسبب التعب والشعور بالنعاس