فكها شوية واعذر غيرك ما يمكن في عنده ظروف ويمكن تتحط انت مكانه.

تاريخ التسجيل : 12/08/2012

بسم الله الرحمن الرحيم

ازيكم يا اجمل ناس في الدنيا ان شاء الله تكونوا دايما بخير.

تعالوا بقى مع بعض نفهم الموضوع كدا واحدة واحدة

تخيل معايا انك اتفقت مع صاحبك انكم هتتقبلوا في المكان كذا... الساعة 3 مثلا انت جهزت نفسك واستعديت قبل الميعاد بنص ساعة ... او ساعة كمان ووصلت للمكان الساعة 3 بالظبط ... رحت ع المكان ملقيتش صاحبك وصل ... وفضلت مستني وهو مجاش لحد ما جه بعدها بنص ساعة ... او اكتر مثلا

بدل ما تقابله وانت غضبان ومضايق وتنهره وتقول له انا كنت وعملت يا اخي افهم منه يمكن كانت عنده ظروف

مش ممكن مثلا يكون حصل ظرف طارئ بيحصل في اى بيت زى ان الكهرباء قطعت ... او ان والدته او والده او اخته او اخوه (بعد الشر عن الجميع) تعب فقعد جانبه لحد ما اتحسن ... ويمكن نزل جاب دوا ومش يمكن هو جهز من قبلك وخلص قبل ما انت تخلص وجاى ينزل ... وكان هيوصل قبل ميعادك ... حصلت حاجة عطلته فجاة

راعي غيرك وراعي ظروف غيرك بلاش تقلب وشك وانت بتقابله وتزعق وتعلي صوتك وتقول له كذا وكذا وكذا ... بدل ما تعمل كدا اضحك في وشه ممكن تكون حاجة حصلت تعبته ... ضايقته في البيت ... ومحتاج انه يفرفش نفسه معاك ... اضحك له ... هزر معاه ... قول له بطريقة جميلة ايه اللي اخرك ؟؟؟ وقول له وانت بتضحك وبتهزر مثلا انك تعبت وانت مستنيه او اضايقت ...

هتلاقيه هو بيعتذر لك ويقول معليش حصل كذا ... متزعلش مني ... المرة الجاية ان شاء الله هاجي في ميعادي ... ومش هيكررها تاني معاك

بدل ما ترفع وتعلي صوتك هتلاقيه بيعلي صوته هو كمان ... وهتتشاجروا ... هيقول لك وفيها ايه لما اتاخر ... حصلت حاجة اخرتني عادي يعني ... وكلام كتير انتوا في غني انكم تقولوه لبعض ... وهتلاقيه مش حابب يخرج معاك تاني لا هو ولا صحابك بسبب طريقتك .

فكر شوية كدا مع نفسك مش ممكن ومحتمل اوي انك تتحط مرة في مكانه ؟؟؟!!!!!!!

لو انت عاملته كويس وقتها وكلمته بطريقة جميلة هو هيرد لك اللي انت عملته وهيعذرك وهيعدي الموضوع لكن لو انت عاملته بطريقة مش كويسة هتلاقيه بردو بيردهالك وهيعمل مشكلة معاك .

ومتنساش انك المفروض : تلتمس لاخيك 70 عذرا / ان بعض الظن اثم .

خلاصة الكلام : اعذر غيرك وعامله بطريقة كويسة عشان تلاقي اللي يعذرك ويقدر ظروفك.

تاريخ التسجيل : 12/06/2013

تسلم الايادى على هذا الموضوع الاكثر من رائع
والـ اروع واروع انك كتبت
خلاصة الكلام : اعذر غيرك وعامله بطريقة كويسة عشان تلاقي اللي يعذرك ويقدر ظروفك.

اهم حاجه الكلام المختصر اصلى مش قريت غير الجمله ديه