رسمت الشوق بحروف القوافي والحنين الوان

تاريخ التسجيل : 18/11/2010

رسمت الشوق بحروف القوافي والحنين الوان
معاني تنسج اللوعه وتعزف صـــرخة الحاني

على بوح القصيد العف بقايا تنشد النسيان
عن أحلامي ؟ عن أوهامي ؟ عن اللي سّبب أحزاني

أشد القــاف من واقع وانا في واقعي حيــران
وأسولف عن ألم جرحي من المجني من الجاني

إهيّجن صوت قيفاني وصوتي بالقصيد أشجان
على رجوى أمل كاذب لقيت البوح يعصــاني

وأصوّر من معاناتي ملامح مالها عنوان
وإثير الموج من فيض المشاعر لين يقراني

أترجم لوعة الذكرى حنين العاشق الولهان
وأهيم بطيفه العابر وأعانق غربة أوطاني

أحسه داخلي عالم بلا شاطيء بلا ربان
وأعوم بموجه العاتي ولا أدري وين وداني

خذاني لآخر الدنيا ويرسم في سماي ألوان
تلّون لي بلون الطيف ونسيت بجوه ألواني

عليــك الله وأمـان الله وجـاه الله عزيز الشأن
تراك أقرب من أنفاسي وساكن وسط وجداني

هلا ياعمري الحاضر .. هلا ياحلمي اللي كان
هلا يانشوة الخــافق .. هلا يانصـــفي الثاني

حبيبي قولها لو كذب أبنسى لوعة الحرمان
حبيبي كلمة أحبـــــك تبّدد فيك حـــــرماني

أشوفك جنة الدنيا .. أشوفك روضة التحنان
أجيك بشوقي العاصف وطيف البعد يحداني

هدير الموج يأخذني وأنا الظامي وأنا الغرقان
على شاطــي غـــلاك اللــي تمنيت وتمــناني

إحسه نبضي وذاتي شعور الشاعر الانسان
كأنه غيمةٍ تطرد سموم القيض بأغصــاني

أو أنه حرف والريشه تجسد صورة الفنان
حبيبً يعزف أحساس الغلا ويترجم الحاني

أحبة كثر حبي له وأنا له عاشــقً ماخان
وعزاي أني رسمته للوفا بحروف قيفاني