قصيدة للعراق 2010 لكل عراقي

تاريخ التسجيل : 18/11/2010

نفس الطاس والحمّام
العراق اشلون تاليّه
حته اهل اللطم والنوح
شو طلعوا حراميه
عصابه التمت ابغداد
نصهم مو عراقيه
محابس كله خمسه غرام
وسبحهم واحد وميه
عمايم تبجي يم حسين
وبالخارج افنديه
فرحنه ياوطن والله
من راحو البعثيه
نفس الآه والونّه
وطنّه اتقوده لوتيه
فلم هندي الوطن والله
فلم وابطاله عجميه
شدّوا عل الجلاب اسروج
ومهرتك بالمنافي اتلوب
عطشانه لكطرة اميّه
افرح يالتريد تفوز
فايز الف بالميه
لأن صوت العراقي انباك
من طبّت همرهم بيهه هكطيه
صار الموت مثل الزاد
لاخوّان لاعمّه ولاخيّه
صوتك ياعراقي انباك
دجاجه اتفرهدت بالريش
دجاجه ويمه واويه
مو اصوات بالصندوك
هاي الناس مرشيه
نازل ياقطار الآه
تعوي ابليّه عبريّه
لاشاعر .. لافنان
كراسي وكله اميّه
شيفيد القلم مكسور
بلاد بلايه حريه
وكل مسؤول يم البيت
ناصبله فضائية
وصحافه ومثل شكل الذيل
هاي ذيول ملويه
نلطم عل النخل كل يوم
وتظل اعيونه اربيّه
لاطارش لامكتوب
صناديك الوطن ابجفوف حمديه
مسكين الشعب مظلوم
عايش كله بالنيه
يركض والعشه خباز
وساسه تفرهد الليّه
لانفطات لاشكرات
حصه وكله منيّه
الهي اليوم اشكيلك
وكلك عل جره بيّه
نفطات الوطن تنباك
وآنه اطفالي مسبيّه
نفس الطاس والحمام
بلادي ابليّه حنيّه
اصبر يافقير الحال
هاي الشدّه مكضيه

تحياتي